ꦥꦿꦤꦠ​ꦩꦁꦱ

ꦏꦁꦒꦺꦴ​ꦔꦝꦺꦥꦶ​ꦏꦲꦤꦤ꧀​ꦲꦥ​ꦮꦲꦺ꧈​​ꦭꦺꦭꦸꦲꦸꦂ​ꦗꦮ​ꦢꦸꦮꦺꦤꦶ​ꦥꦺꦠꦸꦁ​ꦏꦁ​ꦕꦕꦲꦺ​ꦲꦏꦺꦃ​ꦧꦔꦺꦠ꧀꧉​​ꦠꦶꦠꦶꦏꦤꦺ​ꦮꦂꦤ​ꦮꦂꦤ꧈​​ꦲꦤ​ꦏꦁ​ꦱꦺꦱꦩ꧀ꦧꦸꦔꦤ꧀​ꦏꦫꦺꦴ​ꦮꦺꦏ꧀ꦠꦸ꧈​​ꦤꦺꦥ꧀ꦠꦸ​ꦢꦶꦤ​ꦲꦸꦠꦮ​ꦥꦱꦫꦤ꧀꧈​​ꦭꦤ꧀​ꦒꦸꦩꦺꦭꦫꦺ​ꦲꦭꦩ꧀꧉​​ꦄꦤ​ꦲꦶꦁ​ꦠ꧀ꦭꦠꦃ​ꦥꦢꦺꦱꦤ꧀꧈​​ꦱꦸꦥꦪ​ꦲꦁꦒꦺꦴꦤꦺ​ꦥꦝ​ꦗꦺꦗꦺꦴꦝꦺꦴꦮꦤ꧀​ꦭꦺꦱ꧀ꦠꦫꦶ꧈​​ꦱ꧀ꦭꦩꦺꦠ꧀꧈​​ꦧꦒꦾ꧈​​ꦭꦤ꧀​ꦩꦸꦭꦾ꧈​​ꦩꦥꦤꦏꦺ​ꦧꦧ꧀​ꦥꦺꦠꦸꦁ​ꦢꦢꦶ​ꦥꦺꦫꦔꦤ꧀​ꦏꦁ​ꦮꦶꦒꦠꦶ꧉​​ꦥꦺꦠꦸꦁ​ꦔꦺꦤꦤꦶ​ꦱꦔꦠ꧀​ꦲꦏꦢ꧀​ꦤꦶꦏꦃ​ꦭꦤ꧀​ꦲꦶꦗꦧ꧀​ꦏꦺꦴꦧꦸꦭ꧀꧈​​ꦢꦶꦥꦶꦭꦶꦃ​ꦱꦸꦥꦪ​ꦔꦺꦢꦺꦴꦲꦶ​ꦢꦶꦤ​ꦠꦭꦶꦮꦁꦏꦺ​ꦭꦤ꧀​ꦱꦩ꧀ꦥꦂ​ꦮꦁꦏꦺ꧉​​ꦔꦺꦭ꧀ꦩꦸ​ꦔꦺꦤꦤꦶ​ꦥꦺꦠꦸꦁ​ꦲꦺꦴꦫ​ꦧꦶꦱ​ꦥꦶꦱꦃ​ꦠꦸꦩꦿꦥ꧀​ꦩꦤꦸꦁꦱ​ꦗꦮ꧉​​ꦔꦺꦭ꧀ꦩꦸ​ꦥꦺꦠꦸꦁ​ꦮꦶꦱ꧀​ꦚꦮꦶꦗꦶ​ꦏꦫꦺꦴ​ꦱꦶꦏ꧀ꦭꦸꦱ꧀​ꦥꦔꦸꦫꦶꦥꦤꦺ​ꦩꦤꦸꦁꦱ​ꦗꦮ꧉​​ꦥꦺꦠꦸꦁ​ꦢꦢꦶ​ꦥꦶꦫꦤ꧀ꦠꦶ​ꦏꦁꦒꦺꦴ​ꦔꦝꦺꦥꦶ​ꦏꦲꦤꦤ꧀​ꦭꦤ꧀​ꦥꦿꦺꦏꦫ​ꦏꦁ​ꦲꦤ꧉​​ꦄꦤ​ꦲꦶꦁ​ꦧꦸꦢꦪ​ꦗꦮ꧈​​ꦔꦺꦭ꧀ꦩꦸ​ꦥꦺꦠꦸꦁ​ꦩꦭꦺꦧꦸ​ꦲꦤ​ꦲꦶꦁ​ꦫꦤꦃ​ꦏꦮꦱ꧀ꦏꦶꦛꦤ꧀​ꦗꦮ꧉​​ꦧꦧꦒꦤ꧀​ꦥꦺꦠꦸꦁ​ꦲꦤ​ꦏꦁ​ꦤꦺꦩ꧀ꦧꦸꦔꦶ​ꦮꦶꦱ꧀​ꦢꦢꦶ​ꦏꦺꦪꦫꦶꦥ꦳ꦤ꧀​ꦭꦺꦴꦏꦭ꧀​꧌ꦭꦺꦴꦕꦭ꧀​ꦮꦶꦱ꧀ꦢꦺꦴꦩ꧀꧍​​ꦠꦸꦩꦿꦥ꧀​ꦩꦤꦸꦁꦱ​ꦗꦮ꧉​​ꦏꦫꦤ​ꦲꦶꦏꦸ꧈​​ꦥꦺꦠꦸꦁ​ꦢꦶꦪꦸꦒꦺꦩꦶ​ꦢꦢꦶ​ꦥꦻꦴꦒꦺꦫꦤ꧀​ꦲꦸꦠꦮ​ꦥꦿꦤꦠꦤ꧀꧉​​ꦥꦺꦠꦸꦁ​ꦮꦸꦱ꧀​ꦢꦢꦶ​ꦥꦤ꧀ꦢꦩ꧀​ꦥꦤ꧀ꦢꦺꦴꦩꦶꦁ​ꦥꦔꦸꦫꦶꦥꦤ꧀꧉​​ꦏꦭꦺꦧꦸ​ꦲꦤ​ꦲꦶꦁ​ꦏꦺꦤꦺ꧈​​ꦥꦺꦠꦸꦁ​ꦲꦸꦠꦮ​ꦥꦿꦤꦠꦤ꧀​ꦔꦺꦤꦤꦶ​ꦭꦸꦩꦏꦸꦤꦶꦁ​ꦢꦶꦤ​ꦭꦤ꧀​ꦒꦶꦭꦶꦂ​ꦒꦸꦩꦤ꧀ꦠꦶꦤꦶꦁ​ꦩꦁꦱ꧉